Shqiperia dhe Bashkimi me Italine

Monografia mbi Shqipërinë e studiuesit italian Mikele Kraveri përbën një shqyrtim sintetik të historisë dhe gjeografisë së përgjithshme shqiptare duke u mbështetur mbi një lëndë të gjerë burimore e shkrimore të konsultuar prej autorit, me qëllimin që të hedhë dritë sa më të qartë mbi vendin dhe popullin që mbas vitit 1939 kishte bashkuar fatet me Mbretërinë e Italisë. Zbërthimi i elementëve dhe kushteve gjeo-fizike të territorit shqiptar, si natyra gjeologjike, relievi orografik, hidrografia, klima, flora dhe fauna, prej penës së një gjeografi të shquar italian, - pasohen më tej me tablonë e ngjarjeve kruciale historike të popullit shqiptar, me kushtet dhe natyrën demografike, si dhe me gjendjen dhe shfrytëzimin e burimeve natyrore shqiptare deri në vitet 30 të shekullit të njëzet. Me një mprehtësi dhe kthjelltësi politike autori merr në shqyrtim edhe marrëdhëniet e përgjithshme italo-shqiptare të mëhershme që çuan si rrjedhojë në bashkimin e të dy shteteve nën një kurorë të vetme sovraniteti.